Category Archives: Óflokkað
Svona náum við markmiðunum!
Verkefnisstjórn Grænu orkunnar afhenti í dag skýrslu um það hvernig best verði staðið að orkuskiptum í samgöngum. Stjórnvöld hafa sett sér það markmið að árið 2020 komi 10% þeirrar orku sem notuð er í samgöngutækjum frá endurnýjanlegum orkugjöfum. Þetta er metnaðarfullt markmið í ljósi þess að hlutfall vistvænna ökutækja í dag er aðeins 0,35%.
Í skýrslu Grænu orkunnar er m.a. sett fram tímasett aðgerðaáætlun með skilgreindum ábyrgðaraðilum og árangursmælikvörðum. Aðgerðirnar spanna allan feril orkuskipta; frá framleiðslu, í gegnum dreifingu um innviði og til endanotanda. Í skýrslunni er greining á núverandi laga- og skattaumhverfi og settar fram tillögur í skattamálum sem eiga að hvetja til orkuskipta.
Í skýrslunni er fjallað um mikivægi aukinnar samvinnu þeirra sem koma að þróunarverkefnum á þessu sviði og áhersla lögð á að hið opinbera sýni gott fordæmi, t.d. með því að setja fram stefnu um innkaup sem styður við orkuskipti. Jafnframt er skýrslan upplýsingabrunnur um endurnýjanlega orkugjafa, skuldbindingar Íslands á alþjóðavettvangi og stefnumörkun stjórnvalda á undangengnum árum.
Að mati Grænu orkunnar eru ýmis ljón á veginum sem mögulega geta hægt á orkuskiptum og má í því samhengi nefna hátt verð á vistvænum ökutækjum, hæga endurnýjun bílaflotans, skorti á innviðum og óvissu um hvaða orkugjafi/ar verði ofan á. Lögð er áhersla á að stjórnvöld styðji vel við þróunina á fyrstu stigum orkuskipta. Liður í því er að tryggja að tímabil ívilnana verði til ákveðins langs tíma svo dregið verði úr óvissu þeirra sem taka þátt í uppbyggingu orkuskipta. Því er lögð fram tillaga um að ívilnanir á sviði orkuskipta komi ekki til endurskoðunar fyrr en í fyrsta lagi árið 2020. Komi þessi aðgerðaáætlun til framkvæmda er stigið stórt skref með stefnumótun á sviði orkuskipta hér á landi.
Í verkefnisstjórn eru Sverrir Viðar Hauksson formaður f.h. iðnaðarráðuneytis og Bílgreinasambandsins, Bryndís Skúladóttir f.h. Samtaka iðnaðarins, Danfríður Skarphéðinsdóttir f.h. umhverfisráðuneytis, Íris Baldursdóttir f.h. Samorku, Magnús Ásgeirsson f.h. Samtaka verslunar og þjónustu, Ólafur Bjarnason f.h. Sambands íslenskra sveitarfélaga, Runólfur Ólafsson f.h. FÍB, Þorsteinn Rúnar Hermannsson f.h. innanríkisráðuneytis, Ögmundur Hrafn Magnússon f.h. fjármálaráðuneytis
Verkefnisstjóri er Ágústa S. Loftsdóttir Orkustofnun
Með verkefnisstjórn starfa Erla Sigríður Gestsdóttir f.h. iðnaðarráðuneytis og Kolbeinn Marteinsson f.h. iðnaðarráðherra.
Kynning á skýrsludrögum
Fimmtudaginn 3. nóvember var blásið til fundar með aðilum Grænu orkunar þar sem verkefnisstjórn kynnti drög að stefnumótunarskýrslunni og tilheyrandi aðgerðaráætlun.
Hátt í 40 manns mættu á viðburðin sem stóð í rúma 2 tíma. Fjörugar umræður spunnust þar um ýmis viðfangsefni og aðgerðir og skemmst frá því að segja að innlegg fundarins skipti verulegu máli fyrir endanlega niðurstöður í aðgerðum.
Verkefnisstjórn hefur síðan unnið að því að lagfæra og aðlaga skýrsluna og aðgerðaáætlun til samræmis við athugasemdir fundargesta. Gert er ráð fyrir að hægt verði að afhenda ráðherra formlega skýrslu á næstu dögum.
Hvað þarf marga bíla?
Sett hafa verið markmið að 10% orkunotkunar í samgöngum árið 2020 komi frá endurnýjanlegum orkugjöfum. Ef við gefum okkur til einföldunar að þar með þurfi 10% bílaflotans að nýta endurnýjanlega orkugjafa, þá má leika sér með útreikning á hvað það þýðir á komandi árum.
Í dag eru einungis tæplega 1000 bílar sem geta fallið í þessa skilgreiningu hér á landi eða ca. 0,5% flotans (miða við 200.000 bíla). Ef gert er ráð fyrir að nýskráning bíla árin 2012-2020 verði að meðaltali 12.000 bílar pr. ár, þá þýðir það 96.000 ökutæki. Geri jafnframt ráð fyrir að flotin verði svipað stór árið 2020 (nokkur fólksfjölgun en á móti kemur að fjöldi bíla pr. heimili muni fækka).
Það þýðir að 20.000 bílar væru að nýta endurnýjanlega orkugjafa árið 2020 eða að skráningar visthæfra bíla að meðaltali yrðu 2400 bílar á ári. (12.000 heildarskráningar og þar með 20% visthæfir)
Þá spyr maður sig, er það raunhæft?
Vinnu- og stefnumótunarfundur í orkuskiptum í samgöngum
Verkefnisstjórn Grænu orkunar boðar til vinnu- og stefnumótunarfundar í orkuskiptum í
samgöngum. Fundurinn verður haldinn þann 15. september í húsakynnum
Orkustofnunar á Grensásvegi 9 og hefst kl. 9.00. Áætlað er að honum ljúki kl.
12.30, en dagskrá er eftirfarandi;
9.00-9.15
Setning fundar og ávarp iðnaðarráðherra
9.15-9.40
Hvert erum við komin og hver eru næstu skref – Sverrir V Hauksson, form.
verkefnisstjórnar
9.40-9.50
Kaffihlé
9.50-11.3
Vinnuhópar að störfum
11.30-11.45
kaffihlé
11.45-12.30
Kynning vinnuhópa og samantekt
Vinnuhóparnir eru 4 og viljum við biðja þá sem ætla að mæta
á fundinn að STAÐFESTA komu sína og jafnframt að gefa þá upp hvaða hóp þeir óska
eftir að tilheyra.
VINSAMLEGAST STAÐFESTIÐ ÞÁTTTÖKU MEÐ ÞVÍ AÐ SENDA PÓST Á asl@os.is FYRIR 10. SEPT. MEÐ
ÓSK UM HVAÐA HÓP HVER VILL TILHEYRA
Vonumst til að sjá sem flesta – þetta skiptir okkur öll máli.
Iðnaðarráðherra fær vetnisrafbíl til afnota
Iðnaðarráðherra Katrín Júlíusdóttir naut þess í vikunni að fá vetnisrafbíl til afnota. Bifreiðin sem er að gerðinni Hyundai Tucson ix35 er splunknýr og í fullri stærð. Vetnisrafbílinn er hér á vegum skandinavísku vetnisvegasamtakanna (SHHP) og Íslenskrar Nýorku og er koma bílsins hluti af bílaprófunum Hyundai á vetnisrafbílum á Norðurlöndunum. Áfylling bílsins tekur aðeins um þrjár mínútur og hefur hann um 600 kílómetra drægni á einum tanki sem er sambærilegt við það sem hefðbundnir bensínbílar draga.
Vinnufundur í Orkugarði
Græna Orkan boðar til vinnufundar í Orkugarði, Grensásvegi 9, þann 2. desember næstkomandi frá 13:15-17:00. Markmið fundarins er að kalla saman til skrafs og ráðagerða þá aðila sem hafa lýst yfir áhuga á þátttöku í verkefnum tengt orkuskiptum í samgöngum. Græna Orkan hefur nú verið starfandi í tæpt ½ ár og verið vistuð hjá iðnaðarráðuneytinu. Á sínum tíma lýsti iðnaðarráðherra því yfir að vonandi í framtíðinni væri hægt að byggja upp klasasamstarf milli aðila sem eru að vinna að verkefnum tengdum orkuskiptum í samgöngum. Eins og þið vitið öll þá eru orkuskipti og fyrirtæki tengd þeim frekar ung og flest enn á kafi í rannsóknar eða undirbúningsvinnu. Græna Orkan hefur því áhuga á að kanna hvort grundvöllur sé fyrir slíku klasasamstarfi eða hvort rétt sé að reka Grænu Orkuna á annan hátt – t.d. sem eins konar samtök, sem upplýsingamiðstöð fyrir fyrirtæki í þessum geira eða á annan hátt. Til að kanna þetta viljum við bjóða ykkur til þessa vinnufundar. Vonandi geta flestir séð sér fært að koma og viljum við heyra sem flestar hugmyndir.
Nánari upplýsingar og dagskrá fundarins
Til að halda utan um fjölda þátttakenda viljum við endilga biðja ykkur um að láta vita hvort þið takið þátt eða ekki með því að tilkynna þátttöku ykkar á glk@newenergy.is
Tímamótaskýrsla um rafsamgöngur
Fyrir nokkru tóku sig saman mörg af stærstu fyrirtækjum Evrópu sem vinna að bílaframleiðslu og eldsneytisframleiðslu og létu taka saman heildstæða skýrslu um hvernig framtíð rafsamgangna gæti orðið í framtíðinni. Ljóst er að þróunin er á réttri leið. Rafgeymabílar eiga stutt í að koma á markað í auknu mæli en þeir munu þó verða dýrari en hefðbundnir bílar. Rekstrarkostnaður þeirra er þó lægri þannig að gera má ráð fyrir því að heildarrekstrarkostnaður slíkra bíla gæti orðið samkeppnishæfur á árabilinu 2015-2020. Skýrslan er bjartsýn á vetnisrafbíla. Enn er þó framleiðslukostnaður slíkra bíla hærri en rafgeymabíla en skýrsluhöfundar gera ráð fyrir að það gæti breyst á þessum áratug. Einnig gera þeir ráð fyrir því að mikil framleiðsluaukning verði á slíkum bílum eftir 2015 og verðlag samkeppnishæfara.
Skýrslan fjallar einnig talsvert um innviði fyrir bæði rafgeyma og vetnisrafbíla. Enn er nokkuð í land með innviði fyrir báðar gerðir bíla. Skýrsluhöfundar telja þó að mikilvægt sé að koma á öflugri samvinnu einka- og opinbera aðila þegar kemur að uppbyggingu fyrstu innviða. Án innviða gæti innleiðing bíla orðið hægari en ella og því er mikilvægt að lykilaðilar vinni saman að fyrstu skrefum.
Skýrslan er unnin af óháðum aðilum og hvetjum við alla þá sem áhuga hafa á visthæfum samgöngum að lesa hana enda mjög mikilvægt innlegg í umræður um framtíðar samgöngur á Íslandi.
Skýrsla um framtíð rafsamgangna
Eurostars
Eurostars er ný áætlun fyrir lítil og meðalstór fyrirtæki í Evrópu sem vinna sjálf að rannsóknum og þróun.
Ný og endurbætt styrkjasíða Nýsköpunarmiðstöðvar Íslands
Græna Orkan vill vekja athygli á nýrri og endurbættri styrkjasíðu Nýsköpunarmiðstöðvar Íslands. Þar má finna samansafn innlendra, norrænna og evrópskra styrkja sem standa fyrirækjum, félagasamtökum, stofnunum og einstaklingum til boða. Sjá eftirfarandi vefslóð: http://www.nmi.is/styrkir-og-studningsmoguleikar/
Þar má meðal annars finna kynningarfund um samnorræna styrkjamöguleika til umhverfis- og orkumála, þann 3. Nóvember kl. 14-16 í Norræna húsinu.
Skráning á kynningarfundinn fer fram á netfanginu: norden@nmi.is – tilkynna þarf mætingu fyrir 1. Nóvember.
Sjá nánari upplýsingar: http://www.nmi.is/styrkir-og-studningsmoguleikar/norraenir-styrkir-og-studningsmoguleikar/norraent-samstarf/nr/1115/