Category Archives: Orkugjafar

Stena Germanica, fyrsta metanól ferjan, hefur siglingar

Posted on by

Stena Germanica, ferja Stena Line sem siglir á milli Kiel og Gautaborgar, hefur verið breytt og hún gerð umhverfisvænni. Ein af fjórum Wärtsilä vélum hennar gengur nú fyrir metanóli og til stendur að breyta hinum þremur sumarið 2015. Árangur verkefnisins, sem kostaði um 22 milljónir evra, felst fyrst og fremst í stórlækkuðum útblæstri skaðlegra lofttegunda en reiknað er með að útstreymi SOx dragist saman um 99%, NOx um 60%, rykagna um 95% og CO2 um 25%.

Sjá nánar í frétt Kieler Nachrichten og Baltic Transport Journal.

Fyrsta rafmagnsferja heims tekin í notkun í Noregi

Posted on by

Fyrsta bílferja heims sem gengur fyrir rafmagni hefur verið tekin í notkun í Noregi. Ferjan, sem siglir 5,7 km leið á milli Lavik og Oppedal, er smíðuð úr áli og tekur 120 fólksbíla og 350 farþega. Með notkun ferju með rafmótor á þessari siglingaleið í stað vélar sem brennir dísilolíu spararast um ein milljón lítra dísilolíu á ári og komið er í veg fyrir útblástur 570 tonna koltvísýrings.

Sjá nánar í frétt á visir.is og ship-technology.com.

Orkuskipti í samgöngum eru ótvírætt framfaraskref

Posted on by

Unnið hefur verið markvisst að því að auka hlut endurnýjanlegra orkugjafa og í samþykkt Alþingis frá 2011 er kveðið á um að árið 2020 skuli hlutdeild endurnýjanlegra orkugjafa í samgöngum vera 10%. Samdráttur í notkun jarðefnaeldsneytis stuðlar m.a. að umhverfisvernd, gjaldeyrissparnaði og auknu orkuöryggi.

Í frétt á vef atvinnuvega- og nýsköpunarráðuneytisins eru raktir nokkrir upplýsingapunktar um endurnýjanlegt eldsneyti á Íslandi, stefnu stjórnvalda og árangur í málaflokknum.

Áhugaverð erindi á örfyrirlestrum Grænu orkunnar

Posted on by

Fimmtudaginn 26. febrúar stóð Græna orkan, í samstarfi við Hafið, Nordic Marina og Stofnun Sæmundar fróða fyrir örfyrirlestrum um borð í varðskipinu Þór. Gestir hlýddu á fjölbreytt og áhugaverð erindi tengd vistvænni haftengdri starfsemi og almenn ánægja með vinnustofuna. Landhelgisgæslan, Nordic MARINA, RENSEA, CRI, EFLA, Hafið og ARK kynntu verkefni á sínum vegum.

Við þökkum þátttakendum og gestum fyrir komuna og Landhelgisgæslunni sérstaklega fyrir að bjóða varðskipið til afnota sem vettvang vinnustofunnar.

 

Örfyrirlestrar Grænu orkunnar 26. febrúar 2015

Posted on by

Græna orkan, ásamt Hafinu, Nordic Marina og Stofnun Sæmundar fróða stendur fyrir örfyrirlestrum um vistvæna haftengda starfsemi um borð í varðskipinu Þór (sjá nákvæma staðsetningu á korti) á morgun fimmtudag.

Dagskráin verður eftirfarandi:

14:00 Fundarsetning: Bryndís Skúladóttir, stjórnarformaður Grænu orkunnar

14:10 Örfyrirlestrar

  • Landhelgisgæslan, Ásgrímur Ásgrímsson – Starfsemi Landhelgisgæslunnar umhverfis Ísland
  • Nordic Marina, Ágústa S. Loftsdóttir – Samstarfsvettvangur um samdrátt í losun frá haftengdri starfsemi
  • Norðursigling, Árni Sigurbjarnarson – Rafseglbátur Norðursiglingar
  • Carbon Recycling International, Benedikt Stefánsson – Framleiðsla metanóls á Íslandi og notkun sem skiptaeldsneyti
  • EFLA, Eva Yngvadóttir – Umhverfisvænar leiðir EFLU
  • Hafið, Sigríður Ragna Sverrisdóttir – Hafið: Öndvegissetur um sjálfbæra nýtingu og verndun hafsins, Sigríður Ragna Sverrisdóttir
  • ARK Technology, Þorsteinn Svanur Jónsson – Umhverfisstjórn hjá ARK Technology

15:30 Fyrirspurnir og umræður

Gert er ráð fyrir að hver fyrirlestur verði 8-10 mínutur og tími gefist fyrir 1-2 stuttar spurningar að hverjum þeirra loknum. Fundarstjóri verður Bryndís Skúladóttir.

Þátttaka er ókeypis og öllum opin en vinsamlega sendið skráningu til amk@newenergy.is.

Bílastæði eru í Hörpu og gegnt Kolaporti.

Nissan Leaf valinn besti smábíllinn

Posted on by

Alþjóðlega greiningafyrirtækið IHS hefur útnefnt Nissan Leaf besta smábílinn á árinu 2014. Þetta kemur fram í árlegri skýrslu fyrirtækisins sem innheldur meðal annars yfirlit yfir þá bílaframleiðendur sem tekst hvað best að halda tryggð viðskiptavina sinna. Leaf var eini rafbíllinn sem hlaut viðurkenningu IHS fyrir árið 2014.

Sjá umfjöllum mbl.is og IHS.

Samningur um vetnisstöð á Arlanda flugvelli

Posted on by

Linde Group hefur í gegnum norrænt útibú sitt AGA gert samning um að reisa vetnisstöð á Arlanda flugvelli fyrir utan Stokkhólm. Stöðin, sem verður sú stærsta sinnar tegundar í Svíþjóð, mun geta sinnt 180 áfyllingum á dag, og við 700 bara þrýsting mun dælingin einungis taka 3 mínútur. Roger Andersson, þróunarstjóri hjá AGA Clean Energy, telur vetnisbíla með yfir 500 km drægi munu gegna mikilvægu hlutverki við að útrýma notkun jarðefnaeldsneytis í samgöngum fyrir 2030.

Sjá frétt Gasworld

Nissan Leaf söluhæsti rafbíll Evrópu árið 2014

Posted on by

Nissan Leaf seldist í 14.650 eintökum árið 2014, sem jafngildir 33% söluaukningu milli ára. Markaðshlutdeild Leaf nam ríflega fjórðungi, en alls seldust 56.000 rafbílar í Evrópu. Þá var Renault Zoe annar söluhæsti rafbíllinn í Evrópu árið 2014, með 11.227 eintök og Tesla Model S seldist í 8.734 eintökum. Sölu- og markaðsstjóri Nissan, Guillaume Carter, þakkar þetta aukinni vitundarvakningu hvað varðar sparnað í rekstrarkostnaði rafbíla í samanburði við bíla sem nota jarðefnaeldsneyti.

Sjá nánar á Evrópuvef Nissan.

Tveir af hverjum þremur rafhleðslustaurum í London ónotaðir

Posted on by

905 hleðslustaura fyrir rafbíla er að finna víðs vegar um London. Að sögn talsmanns breska bíleigendafélagsins RAC voru einungis 36% þeirra notaðir í júní 2014 og um fjórðungur notaður í júní mánuði árið áður. Hins vegar var rafbílum stungið í samband 2234 sinnum í júní 2013 en 4678 sinnum í sama mánuði 2014 og þykja þessar tölur endurspegla fjölgun rafbíla í borginni.

Sjá nánar í frétt mbl.is

1500 Mirai vetnisbílar seldir

Posted on by

Frá því Toyota kynnti Mirai vetnisbíl sinn um miðjan nóvember síðasta árs hafa pantanir fyrir 1500 bíla borist. Meirihluti þeirra, eða 60%, er frá ríkisstofnunum og fyrirtækjum. Viðbrögðin fara fram úr björtustu vonum Toyota manna, sem höfðu áætlað að seldir yrðu 400 bílar á árinu 2015.

Sjá frétt á mbl.is og Wall Street Journal