Alls var um 19,5 milljónum króna úthlutað úr styrktarsjóði til fjórtán húsfélaga í Reykjavík á síðasta ári vegna uppsetningar hleðslubúnaðar fyrir rafbíla á lóðum fjöleignarhúsa.
Um er að ræða sjóð á vegum Reykjavíkurborgar og Orkuveitu Reykjavíkur sem liðka á fyrir stórfelldri uppbyggingu innviða í borginni fyrir rafbílaeigendur. Hvor aðili um sig leggur 20 milljónir á ári til sjóðsins í þrjú ár, alls 120 milljónir króna.
Kynningarfundur Loftslagssjóðs verður haldinn í Norræna húsinu fimmtudaginn 28. nóvember kl. 12:00-13:00
Hlutverk Loftslagssjóðs er að styðja við nýsköpunarverkefni á sviði loftslagsmála og verkefni sem lúta að kynningu og fræðslu um áhrif loftslagsbreytinga. Á fundinum verða áherslur fyrir fyrstu úthlutun kynntar sem og umsóknarferli.
Dagskrá verður eftirfarandi:
– Ávarp: Guðmundur Ingi Guðbrandsson, umhverfis- og auðlindaráðherra
– Áherslur stjórnar: Hildur Knútsdóttir, formaður stjórnar
– Handbók sjóðsins, umsóknarkerfi og faglegt matsferli: Ása Guðrún Kristjánsdóttir, sérfræðingur hjá Rannís
Húsið opnar kl. 11:30 og boðið verður upp á léttan hádegisverð fyrir fundinn. Skráning fer fram hér en einnig verður streymt frá fundinum. Sjá einnig á Facebook síðu viðburðar.
Nýverið úthlutaði Orkusjóður styrkjum til uppsetningar hleðslustöðva við hótel og gististaði víða um land, þar sem hægt verður að hlaða ríflega 110 rafbíla á hverjum tíma. Verkefnið er hluti af aðgerðaáætlun stjórnvalda í loftslagsmálum og uppbyggingu innviða vegna orkuskipta í samgöngum. Staðsetningar hleðslustöðvanna eru merktar með grænu á meðfylgjandi korti en nánar má lesa um úthlutunina á vefsíðu Orkustofnunar.
Föstudaginn 15. mars verður áttundi viðburður í fyrirlestraröð Grænu orkunnar og Orkustofnunar. Að þessu sinni munum við fjalla um innlenda framleiðslu lífeldsneytis.
Fyrirkomulagið með hefðbundnum hætti, húsið opnar klukkan 11:30 með léttum veitingum en formleg dagskrá er 12:00-13:00.
Hjalti Þór Vignisson, framkvæmdastjóri sölu og þróunar hjá Skinney-Þinganesi og Sandra Rán Ásgrímsdóttir hjá Mannviti munu fjalla um verkefni sem snýr að repjuræktun og framleiðslu á umhverfisvænni skipaolíu og er unnið í samstarfi við Samgöngustofu. Þess má geta að í október síðastliðnum hlaut Skinney-Þinganes umhverfisverðlaun atvinnulífsins fyrir framtak ársins á sviði umhverfismála. Fleiri erindi um lífeldsneyti verða staðfest á næstu dögum.
Fyrirlestrarnir fara fram í Orkugarði, Grensásvegi 9 en þangað ganga strætisvagnar númer 2, 3, 6, 14, 15, og 17 og yfirbyggð hjólageymsla er á bakvið húsalengjuna, við hliðina á Frumherja.
Viðburðurinn er öllum opinn, aðgangur ókeypis og verður honum streymt.
Sjá nánar um viðburðinn hér á Facebook.
Nýverið var tilkynnt að NCE Maritime CleanTech í Noregi hefði hlotið 11,5 milljón evra styrk úr Horizon 2020 prógrammi Evrópusambandsins til að þróa rafdrifna ferju sem ganga mun á milli Stavanger og Hommersåk.
Við hjá Grænu orkunni hlökkum til að fylgjast með verkefninu á næstu árum. Sjá nánar í tilkynningu frá fyrirtækinu.
Skeljungur og Íslensk NýOrka taka þátt í verkefni ESB „Hydrogen Mobility Europe“ og standa fyrir spennandi og metnaðarfullu málþingi um nýjar lausnir í orkumálum, með sérstakri áherslu á hlutverk vetnis. Sjá nánar um málþingið og skráningu hér.
Græna orkan vekur athygli á því að út janúar mánuð er hægt að fræðast um vinningstillögur í Hugmyndasamkeppni Íslenska sjávarklasans, atvinnuvega- og nýsköpunarráðuneytisins og Íslenskrar NýOrku um vistvænt skip á sýningu í Sjávarklasanum við Grandagarð 16.
Ragnheiður Elín Árnadóttir, iðnaðar- og viðskiptaráðherra, veitti fyrir áramót 16 styrki til uppbyggingar á innviðum fyrir rafbíla. Til ráðstöfunar í verkefnið var 201 milljón, eða 67 milljónir króna á ári í þrjú ár.
Sjá nánar á ruv.is og á vef atvinnuvega- og nýsköpunarráðuneytisins.
Iðnaðar- og viðskiptaráðherra hefur staðfest tillögur ráðgjafanefndar Orkusjóðs um veitingu styrkja til uppbyggingar innviða fyrir rafbíla. Verkefnið er hluti af sóknaráætlun Íslands í loftslagsmálum sem sett var fram í tengslum við 21. fund aðildarríkja loftslagssamningsins í París (COP21).
Samkvæmt tillögum ráðgjafarnefndar Orkusjóðs hljóta 16 verkefni styrk, samtals að fjárhæð 201 m.kr. Með þessum verkefnum verður hægt á næstu tveimur árum að byggja upp heildstætt net hleðslustöðva fyrir flesta landsmenn og þannig stigið stórt skref í rafbílavæðingu Íslands. Er þar bæði um hraðhleðslustöðvar og hefðbundnar hleðslustöðvar að ræða, samtals 42 hraðhleðslustöðvar og 63 hefðbundnar stöðvar.
Sjá nánar í tilkynningu ráðuneytisins hér.
