Enn ívilna vestræn ríki jarðefnaeldsneyti

Posted on by

Þrátt fyrir áratugalanga umræðu um gróðurhúsaáhrif og hnattræna hlýnun er jarðefnaeldsneyti víða enn ívilnað sem gerir það að verkum að það vistvænt eldsneyti og endurnýjanlegir orkugjafar eru síður samkeppnishæft á markaði. Nú í síðustu viku á fundi G20, hópi 20 ríkja með stærstu hagkerfi heims, tókst enn ekki að ná sátt um hvernig draga mætti úr ívilnunum  vegna jarðefnaeldsneytis. Þar stóðu Sádi Arabar helst í vegi fyrir því að samkomulag næðist þrátt fyrir að þeir hafi þegar byrjað að draga úr niðurgreiðslu á jarðefnaeldsneyti heima fyrir.

Sjá nánar í frétt Washington Post.

Drög að lífhagkerfisstefnu Íslands kynnt

Posted on by

Undanfarna mánuði hefur farið fram vinna á vegum sjávarútvegs- og landbúnaðarráðherra við gerð stefnu um eflingu lífhagkerfisins á Íslandi.
Markmið lífhagkerfisstefnu fyrir Ísland eru að styðja sjálfbæra þróun og uppbyggingu atvinnulífs sem byggir á nýtingu lífauðlinda, þvert á hinar svonefndu hefðbundnu atvinnugreinar, landbúnað, sjávarútveg og matvælavinnslu.

Nú hafa drög að stefnunni verið birt og eru til kynningar. Þeir sem láta sig þetta málefni varða eru hvattir til að kynna sér drögin og senda athugasemdir eða ábendingar til ráðuneytisins fyrir 20. ágúst 2016.

Sjá nánar á vef atvinnuvega- og nýsköpunarráðuneytisins.

Lífhagkerfisstefna 2016

Nissan þróar efnarafala fyrir etanól

Posted on by

Nissan tilkynnti nýverið að fyrirtækið ætlaði óhefðbundna leið miðað við marga keppinauta sína varðandi bifreiðar með efnarafala. Japanski bílaframleiðandinn hefur í hyggju að þróa efnarafala fyrir etanól í stað vetnis, sem Hyundai og Toyota hafa þegar gert. Nissan áætlar að bifreiðarnar verði komnar á almennan markað árið 2020.

Sjá nánar hér.

Þingsályktunartillaga um orkuskipti kynnt á vorþingi

Posted on by
Þingsályktunartillaga um orkuskipti var lögð fram á lokadögum vorþingsins til kynningar en hún er hluti af sóknaráætlun stjórnvalda í loftslagsmálum. Tillagan er unnin í samstarfi við Grænu orkuna, samstarfsvettvang um orkuskipti og felur hún í sér markmið um orkuskipti á landi, láði og legi sem ná allt til ársins 2030.    Í tillögunni er aðgerðaráætlun í 25 liðum sem miða að því að draga kerfisbundið úr notkun jarðefnaeldsneytis og er m.a. stefnt að því að endurnýjanleg orka í samgöngum á landi verði 30% og 10% á hafi árið 2030.
Sjá þingsályktunartillöguna í heild sinni hér.

Nordic Energy Technology Perspectives 2016 kynning

Posted on by

Næstkomandi mánudag, 13. júní,  munu norrænir vísindamenn og Alþjóða orkumálastofnunin (IEA), kynna skýrslu um viðhorf til orkutækni og þróun orkumarkaðarins á Norðurlöndunum til ársins 2050.

Skýrslan, Viðhorf til orkutækni á Norðurlöndunum 2016 (Nordic Energy Technology Perspectives 2016) er norræn útgáfa af sambærilegri alþjóðlegri skýrslu.  Í skýrslunni kemur fram að í gegnum svæðisbundið samstarf geta Norðurlönd náð nánast kolefnishlutlausu orkukerfi árið 2050 og dregið úr kolefnisútblæstri í Evrópu með útflutningi á hreinni raforku.

Sjá nánar á síðu Orkustofnunar og NETP, dagskrá fundarins hér.

Skráning til þátttöku hér.

Aðalfundur Grænu orkunnar 2016

Posted on by

 

Stjórn Grænu orkunnar boðar til aðalfundar félagsins miðvikudaginn 25. maí næstkomandi klukkan 16. Fundurinn verður haldinn í húsakynnum Orkugarðs, Grensásvegi 9.

Aðeins félagsmenn mega sitja aðalfund og er einungis eitt atkvæði á hvert aðildarfyrirtæki eða –stofnun. Félagsmenn teljast þeir sem greiða aðildargjald og öðlast þannig kjörgengi og kosningarétt en aðildargjöld skulu greiðast fyrir 23. maí.

Dagskrá:

Kosning fundarstjóra og fundarritara

  1. Skýrsla stjórnar lögð fram
  2. Reikningar lagðir fram til samþykktar
  3. Lagabreytingar
  4. Ákvörðun árgjalds
  5. Kosning stjórnar
  6. Önnur mál
  7. Fundi slitið

Á síðasta aðalfundi, sem jafnframt var fyrsti aðalfundur Grænu orkunnar, Samstarfsvettvangs um orkuskipti, voru fjórir einstaklingar kosnir í stjórn til tveggja ára. Ekki verður því kosið í stjórn að þessu sinni.

Tillögur, sem óskað er eftir að teknar verði til afgreiðslu á fundinum, skulu hafa borist til amk@newenergy.is a.m.k. 7 dögum fyrir aðalfund.

Að loknum hefðbundnum fundarstörfum mun Ágústa Loftsdóttir, verkefnisstjóri hjá  Orkustofnun í eldsneytismálum og vistvænni orku, fara yfir helstu atriði nýrrar eldsneytisspár Orkuspárnefndar.

Brunavélar í bílum bannaðar í Hollandi 2025?

Posted on by

Í Hollandi hefur hópur þingmanna verkamannaflokksins PvdA lagt fram ályktun  í neðri deild þingsins í Haag sem felur í sér þá stefnu að leyfa einungis sölu hreinorkubíla í landinu frá og með árinu 2025. Í þennan flokk falla bílar sem ekki gefa frá sér neinar gróðurhúsalofttegundir eða aðra mengun, rafbílar og vetnisbílar. Tillagan er umdeild enda ekki ljóst hvernig innviðir skulu styrktir til að mæta þörfum svo margra rafbíla en í henni er einnig kveðið á um að fjárfest skuli í sjálfakandi bílum  í þeim tilgangi að draga úr umferðarteppum í landinu.

Þess má geta að í París í desember fyrra settu 8 ríki í Bandaríkjum Norður Ameríku og 5 fullvalda ríki á stofn Alþjóðabandalag um hreinorkubíla (e. International Zero-Emission Vehicle Alliance) hvers stefna er að hraða rafbílavæðingu þannig að allir nýir bílar verði hreinorkubílar árið 2050.

Sjá nánar í frétt mbl.is og Inside EVs.